A Biblioteca escolar ten a palabra é o lema que vai presidir a actividade de todas as bibliotecas escolares neste curso 21/22. Con el quérese suliñar o valor da palabra e a oralidade.
As bibliotecas son espazos de encontro que promoven e facilitan o uso da palabra a través do diálogo, a reflexión, a exposición, a lectura en voz alta, … co que se acada un dominio da linguaxe e da lingua que lle é propia.
A Biblioteca Escolar ten a palabra é tamén unha proposta para a recuperación da tradición oral como unha forma de achegar o alumnado ás raíces da cultura na que medra, facilitándolle así as claves para acceder ao rico patrimonio inmaterial galego que ten dereito a coñecer, gozar e darlle continuidade.
E o noso Proxecto Documental Integrado deste curso é unha oportunidade para facer realidade este último obxectivo. Este ano queremos achegarnos aos nosos avós e avoas para coñecer, recuperar e valorar tantas historias, lendas, contos, tradicións, xogos,…. e vidas que merecen ser contadas e compartidas.
Falade cos vosos avós e avoas para que vos conten cantigas, refráns, historias, xogos, …. que compartiremos na semana do 25 ao 29 de outubro en cada unha das titorías. Canta vida imos descubrir!!!!